Фасеҳзода Ислом Саймирзо

Директор

Тел.: +992 918-719-719

E-mail: fasikhov83@mail.ru

Маркази тадқиқоти идоракунии давлатӣ ва хизмати давлатӣ дар сохтори Донишкадаи такмили ихтисоси хизматчиёни давлатии Ҷумҳурии Тоҷикистон ташкил ёфта, моҳи январи соли 2009 расман ба фаъолият оғоз намудааст. Дар асоси тағйир ёфтани мақоми  Донишкада ва таҷдиди сохтори он аз моҳи августи соли 2013 Марказ ба Пажуҳишгоҳи идоракунии давлатӣ ва хизмати давлатии  Донишкадаи идоракунии давлатии назди Президенти Ҷумҳурии Тоҷикистон табдил дода шудааст.

Ҳамзамон, дар асоси фармони Президенти Ҷумҳурии Тоҷикистон №1463, аз 29 феврали соли 2020 Донишкада ба Муассисаи давлатии «Академияи идоракунии давлатии назди Президенти Ҷумҳурии Тоҷикистон» табдил дода шуд ва дар назди Пажуҳишгоҳ 4 маркази омӯзишии илмӣ-таҳқиқотии зерин таъсис ёфт:

1.Маркази таҳлил ва тадқиқоти идоракунии давлатӣ ва хизмати давлатӣ.

2.Маркази муқовимат бо коррупсия ва тадқиқоти сотсиологӣ.

3.Маркази омӯзиши масоили муҳоҷират.

4.Маркази идоракунии лоиҳаҳо.

Ҳайати кормандону омӯзгорони Пажуҳишгоҳи идоракунии давлатӣ ва хизмати давлатӣ айни ҳол 4 нафар:  Фасеҳзода И.С., Достиев Э.А., Сайдалиев Х.А.  ва  Маҳмадов Р.С. — ро ташкил медиҳад, ки аз онҳо: 3 нафар номзади илмҳои иқтисодӣ, дотсент ва 1 нафар муаллими калон мебошанд.

Роҳбарии Пажуҳишгоҳи идоракунии давлатӣ ва хизмати давлатиро солҳои 2009-2013 доктори илмҳои таърих, профессор Искандаров Қосимшо, солҳои 2013-2015 номзади илмҳои филологӣ, дотсент Ализода Баҳриддини Пирмуҳаммад, солҳои 2015-2020 доктори илмҳои филологӣ, профессор Мухторов Зайниддин Мухторович ва солҳои 2020-2022 номзади илмҳои иқтисодӣ, дотсент Ғоибназарзода Саид ба уҳда доштанд. Аз моҳи августи соли 2022 то инҷониб роҳбарии Пажуҳишгоҳро номзади илмҳои иқтисодӣ, дотсент Фасеҳзода Ислом Саймирзо ба уҳда дорад.     

Пажуҳишгоҳи идоракунии давлатӣ ва хизмати давлатӣ яке аз муҳимтарин ҷузъи илмию таҳлилии сохтори Академияи идоракунии давлатии назди Президенти Ҷумҳурии Тоҷикистон ба шумор рафта, тибқи дастуру супоришҳои Асосгузори сулҳу ваҳдати миллӣ, Пешвои миллат, Президенти мамлакат муҳтарам Эмомалӣ Раҳмон, Дастгоҳи иҷроияи Президенти Ҷумҳурии Тоҷикистон, санадҳои меъёрӣ-ҳуқуқии Вазорати маориф ва илми Ҷумҳурии Тоҷикистон, Оинномаи Академия, Низомномаи Пажуҳишгоҳ ва дастуру супоришҳои роҳбарияти Академия аз рӯзи таъсисёбӣ то ба имрӯз  таҳқиқоти бунёдӣ ва фаъолияти илмӣ, таҳлилию иттилоотӣ ва илмӣ-методиро  ба роҳ монда, дар тайёр кардани кадрҳои илмии муассиса саҳми арзанда дорад.

Дар Пажуҳишгоҳи идоракунии давлатӣ ва хизмати давлатӣ гузаронидани мизҳои мудаввари илмӣ-назариявӣ низ анъана шудааст. Одатан, дар ин суҳбатҳои илмӣ оид ба мавзуъҳои мубрами рӯз олимони шинохта бо маърузаҳои илмӣ баромад карда истодаанд, ки дар он аксари мутахассисони соҳаи идоракунии давлатӣ ва хизмати давлатӣ иштирок доранд.

Дар ташкил ва рушди Пажуҳишгоҳи идоракунии давлатӣ ва хизмати давлатӣ олимони шинохтаи тоҷик: Искандаров Қ., Ализода Б. П., Мухторов З. М., Ғоибназарзода С. М. ва Фасеҳзода И. С., Шарипов Ҷ., Достиев Э.А., Нуриддинов Ҳ., Дӯстов Д.К., Мирзоев И.Қ. хизмати шоиста намудаанд.

Дар солҳои охир кормандони ҷавон: Шарифзода П.А., Абдуғанизода Б.А., Ибодуллоев А.Р., Кишварова М.Ҷ., Муҳаммадҷонзода Ҷ.Ҷ.,       Восиев А., Икромов Б., Қурбонова М.М., Нодирова М., Қосимзода М.Ф., Холиқов Ш.Х., Аҳмадбекова А.Д. фаъолияти кории худро ба Пажуҳишгоҳ пайвастанд.

Пажуҳишгоҳи идоракунии давлатӣ ва хизмати давлатӣ яке аз воҳидҳои сохтории пешқадами Академия буда, бо бисёр муассисаҳои илмию тадқиқотӣ ва муассисаҳои олии таълимии ҷумҳурӣ: Маркази тадқиқоти стратегии назди Президенти Ҷумҳурии Тоҷикистон, Институти иқтисодиёти кишоварзии Академияи илмҳои кишоварзии Тоҷикистон, Академияи миллии илмҳои Тоҷикистон, Вазорати рушди иқтисод ва савдои Ҷумҳурии Тоҷикистон, кафедраи таҳлили иқтисодии Донишгоҳи давлатии молия ва иқтисоди Тоҷикистон робити зичи ҳамкорӣ дорад.

Самтҳои асосии фаъолияти Пажуҳишгоҳ:

— амалисозии таҳқиқоти бунёдӣ ва амалӣ дар соҳаи идоракунии давлатӣ ва хизмати давлатӣ;

— таҳияи тавсияҳо оид ба такмили низоми идоракунии давлатӣ ва хизмати давлатӣ;

— ҳамкории байналмилалӣ дар самти таҳқиқоти бунёдӣ ва амалӣ дар соҳаи идоракунии давлатӣ ва хизмати давлатӣ;

— омӯзиши таҷрибаи ҷаҳонии идоракунии давлатӣ ва хизмати давлатӣ.

— таҳияи лоиҳаҳои илмӣ – таҳқиқотӣ дар мавзуъҳои вобаста ба идоракунии давлатӣ ва хизмати давлатӣ.

— ҳамоҳангсозӣ ва назорат аз болои лоиҳаҳои илмӣ-таҳқиқотӣ, ки барои арзёбӣ ҷиҳати маблағгузорӣ пешниҳод мешаванд;

— ҳамкории байналмилалӣ дар самти таҳқиқоти бунёдӣ ва амалӣ дар соҳаи идоракунии давлатӣ ва хизмати давлатӣ;

— ташкил ва мусоидат барои иштироки омӯзгорон ва кормандони илмии Академия дар конференсия, симпозиумҳо ва семинарҳои илмӣ-методӣ;

Пажуҳишгоҳи идоракунии давлатӣ ва хизмати давлатӣ ҳамчун воҳиди сохтории муҳимми Академия дар кори гузаронидани тадқиқотҳои илмӣ дар соҳаи идоракунии давлатӣ ва хизмати давлатӣ ҷиҳати самаранок намудани фаъолияти факултетҳо, магистратура, курсҳои азнавтайёркунӣ ва такмили ихтисоси хизматчиёни давлатӣ бо назардошти меъёрҳои байналмилалӣ нақши фаъол дорад.

Вазифаҳои Пажуҳишгоҳ:

— гузаронидани таҳқиқотҳои илмӣ дар соҳаи идоракунии давлатӣ ва хизмати давлатӣ;

— ҳамоҳангсозии фаъолияти илмӣ-тадқиқотии Академия бо муассисаҳои илмӣ-таҳқиқотӣ, муасисаҳои таълимии олии касбӣ ва иловагии касбӣ, ки барои идоракунии давлатӣ ва соҳаи хизмати давлатӣ мутахассис тайёр мекунанд ва ба азнавтайёркунию такмили ихтисоси хизматчиёни давлатӣ машғул мебошанд;

— иштирок дар кори банақшагирии тадқиқоти бунёдии масъалаҳои назариявӣ ва амалииидоракунии давлатӣ ва соҳаи хизмати давлатӣ;

— ташкил, ҳамоҳангсозӣ ва арзёбии тамоми фаъолияти тадқиқоти илмӣ дар Академия;

— иштирок дар таҳияи созишномаҳо, барномаҳо ва лоиҳаҳои байниидоравӣ ва байналмилалӣ доир ба ҳамкориҳои илмӣ дар идоракунии давлатӣ ва соҳаи хизмати давлатӣ;

— таҳияи маълумотномаҳои таҳлилӣ доир ба масъалаҳои гуногуни идоракунии давлатӣ ва хизмати давлатӣ барои мақомоти роҳбарикунандаи давлатӣ бо супориши мақомот ва  ғайра.

Пажуҳишгоҳи мазкур бо васоитҳои техникӣ пурра таъмин буда,  дорои панҷ адад  компютери пайваст бо хатти интернет ва чор адад принтер мебошад, ки устодон аз онҳо ба таври васеъ истифода бурда истодаанд.

Ҳайати кормандони Пажуҳишгоҳ вобаста ба самтҳои марбут корҳои илмӣ-таҳқиқотӣ бурда истодаанд ва вобаста ба масъалаҳои мубрами рӯз ҳамасола дар Пажуҳишгоҳ конфронс, мизҳои мудаввар, семенарҳои илмӣ-амалӣ гузаронида мешаванд.

Дар Пажуҳишгоҳ ба масъалаи тадқиқоти илмии бунёдӣ оид ба масъалаҳои муҳимми идоракунии давлатӣ ва хизмати давлатӣ, инчунин, равандҳои сиёсӣ, дипломатия ва масоили ҷаҳонишавӣ таваҷҷуҳи зиёд зоҳир карда мешавад. Омӯзиши таҷрибаи идоракунии давлатӣ ва хизмати давлатии кишварҳои пешрафта ва равандҳои сиёсии ҷаҳони муосир низ яке аз самтҳои муҳимми корҳои илмию таҳқиқотиро ташкил мекунанд.

Яке аз самтҳои муҳимми фаъолияти илмии Пажуҳишгоҳ таҳияи лоиҳаҳои илмӣ-таҳқиқотӣ ва дар доираи онҳо анҷом додани корҳои илмӣ мебошад.

Дар Пажуҳишгоҳ то имрӯз китобҳои илмӣ, адабиёт ва дастурҳои методӣ оид ба масъалаҳои назария ва амалияи идоракунии давлатӣ, хизмати давлатӣ ва масоили мубрами муносибатҳои байналмилалӣ ва дигар дастурҳои илмӣ-методӣ дар бораи масъалаҳои идоракунии давлатӣ, хизмати давлатӣ, сиёсат ва идораи давлатӣ таҳия ва чоп гардидаанд.

Дар маҷмуъ, дар Пажуҳишгоҳ аз рӯзи таъсисёбӣ то ба имрӯз 14 китобу монография, зиёда аз 180 мақолаи илмӣ таҳия ва нашр гардида, ду рисолаи докторӣ ва 2 рисолаи номзадӣ ҳимоя гардидааст.

Кормандони Пажуҳишгоҳ мунтазам дар конференсия, мизҳои мудаввар, семинарҳои илмӣ иштирок ва баромад мекунанд. Дар маҷмуъ, тамоми дастовардҳо ва нишондиҳандаҳои илмӣ- таҳқиқотии кормандони Пажуҳишгоҳ сол ба сол афзуда, саҳми кормандони он дар рушди илми тоҷик, бахусус, идораи давлатӣ ва хизмати давлатӣ назаррас аст.