Ифтитоҳи китобхонаи бадеӣ – сиёсӣ

4 – уми феврали соли 2020 дар доираи дар амал татбиқ намудани дастуру ҳидоятҳои Асосгузори сулҳу ваҳдати миллӣ – Пешвои миллат Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ дар Донишкадаи идоракунии давлатии назди Президенти Ҷумҳурии Тоҷикистон бо иштироки Аҳлиддин Холов, намояндаи Дастгоҳи иҷроияи Президенти Ҷумҳурии Тоҷикистон, ректори донишкада, профессор Ғафурзода Абдухалил, Аюбӣ Бибиосия, муовини директори Агентии хизмати давлатии назди Президенти Ҷумҳурии Тоҷикистон устодон, кормандон, донишҷӯёну магистрантон ва рӯзноманигорон китобхонаи бадеӣ – сиёсӣ ифтитоҳ гардид.

Профессор Абдухалил Ғафурзода, зимни суханронии худ изҳор дошт, ки таваҷҷуҳи Ҳукумати мамлакат, хусусан Пешвои муаззами миллат, муҳтарам Эмомалӣ Раҳмон ба бунёди китобхонаҳо ва ҷалби наврасону ҷавонон, хусусан, донишҷӯён ба китобхонӣ хеле зиёд буда, ба хотири соҳибмаълумот намудан ва такмили дониши ҷомеа пайваста чораҳои судманд ва натиҷабахш роҳандозӣ мешаванд.

– Китобхонае, ки имрӯз бо теъдоди беш 5 ҳазор китобҳои бадеӣ –сиёсӣ  дорои беш аз 253 ҳазор китоби электронӣ мавриди баҳрабардорӣ қарор гирифт, идомаи татбиқи сиёсати давлату Ҳукумат дар самти маориф ва ҷавонон буда, барои донишандӯзии шумораи зиёди муҳассилин мусоидат менамояд,-илова намуд ректор.

Ҳамчунин,  зикр шуд, ки Президенти Ҷумҳурии Тоҷикистон муҳтарам Эмомалӣ Раҳмон дар Паёми навбатии худ ба Маҷлиси Олӣ перомуни масоили вобаста ба китобу китобдорӣ, мутолиаи китоб, бавижа,  китобҳои бадеӣ, ибрози назар намуда, таъкид кардаанд: «Китобхонаҳо бояд ба маркази муҳими илму фарҳанг табдил дода шаванд, зеро китоб маҳсули ақлу заковати мардуми соҳибтамаддун, омили асосии ҳифзи фарҳанги миллӣ ва яке аз муҳимтарин воситаҳои маърифатнок кардани аҳли ҷомеа буда, қобилияти сухандониву суханрониро сайқал медиҳад, доираи андешаву тафаккур ва ҷаҳонбинии инсонро васеъ ва ӯро ба роҳи дурусти зиндагӣ раҳнамоӣ мекунад».

Бо назардошти муҳимияти мутолиаи китоб ва нақши он дар баланд бардоштани маънавиёти мардум, ташаккули завқи бадеӣ ва зебоиписандӣ Пешвои миллат ба вазоратҳои маориф ва илм, фарҳанг, сохторҳои илмӣ, роҳбарони вилоятҳо, шаҳру ноҳияҳо ва муассисаҳои таълимии ҳамаи зинаҳои таҳсилот дастур доданд, ки чопи китобҳои бадеиро зиёд намуда, дар як сол хондани на камтар аз панҷ китоб ва ҳифзи асарҳои манзуму мансури адибони гузаштаву муосирро ба роҳ монанд ва иҷрои онро зери назорати қатъӣ қарор диҳанд.

Ҳамзамон, Сарвари давлат дар Паём дар бораи аз гардиш мондани китоб, ки ҷузъи муҳими  сарвати маънавии ҷомеа маҳсуб меёбад, ибрози нигаронӣ намуда, таъсири паёмадҳои манфии онро барои фарҳанги миллӣ таъкид карданд.

Зикр гашт, ки китобхонаи мазкур бо ташаббуси роҳбарияти Донишкада ва устодону кормандон таъсис дода шудааст. Дар охир ба иштирокчиёну  ғолибони озмуни  “Фурӯғи субҳи доноӣ”  “Тоҷикистон Ватани азизи ман” “Донишҷӯи сол -2019” бо диплом, сипоснома, туҳфаҳои арзишманд қадрдонӣ карда шуданд.